O‘ktam Hakimovning huquqi sudda tiklandi
Farg‘ona viloyatidagi tumanlararo sudda taniqli bastakor O‘ktam Hakimovning “Ismigul” qo‘shig‘ining mualliflik huquqlari buzilishi bo‘yicha da’vo ko‘rib chiqildi. Bu haqda Zamin.uz xabar berdi.
Ishda javobgar sifatida Nadyr taxallusi bilan tanilgan ijodkor Nodirbek Igamberdiyev ishtirok etdi. U 2023-yilda “Ismigul” qo‘shig‘ini “Enigma” uslubida qayta aranjirovka qilib, bir nechta xalqaro platformalarda tarqatgan edi.
Ushbu versiya iTunes reytingida ilk o‘nlikka kirgan va Instagramda keng tarqalgan. Biroq muallif tomonidan huquqbuzarlik yuzasidan murojaatlar kelib tushgach, qo‘shiq barcha platformalardan olib tashlandi.
O‘zbekiston Mualliflik va turdosh huquq egalari jamoat birlashmasi tomonidan keltirilgan da’vo asosida sud Nodirbek Igamberdiyevdan jami 46 million 200 ming so‘m miqdorida tovon undirishga qaror qildi. Shundan 41,2 million so‘m mualliflik huquqining buzilishi oqibatida yetkazilgan zarar uchun va 5 million so‘m ma’naviy zarar sifatida belgilandi.
Sud hukmiga ko‘ra, Nodirbek Igamberdiyev “Ismigul” asaridan foydalanishni to‘liq to‘xtatishi shart. Xususan, qo‘shiqni efirga uzatish, ijtimoiy tarmoqlarda tarqatish hamda teleradiokanallar orqali namoyish qilish qat’iyan taqiqlanadi.
O‘zbekiston qonunchiligiga muvofiq, mualliflar huquqlari buzilgan taqdirda zararni qoplash yoki bazaviy hisoblash miqdorining 20 baravaridan 1000 baravarigacha kompensatsiya talab qilish huquqiga ega.
