Feruza Normatova: "Muhabbatda yoshning ahamiyati yo‘q"
Aktrisa Feruza Normatova yaqinda Instagram sahifasi orqali obunachilarining savollariga javob berdi. Bu haqda Zamin.uz xabar berdi.
U ayniqsa, so‘nggi vaqtlarda ko‘p muhokama qilinayotgan mavzu — turmush o‘rtog‘i bilan yosh farqi haqida o‘z fikrlarini ochiq bayon etdi. Ma’lumki, Feruza Normatova 2025-yil 15-oktabr kuni Xorazm viloyatidan bo‘lgan 23 yoshli MMA jangchisi Olloyor Abdushukurov bilan turmush qurgan.
Ushbu nikohdagi yosh farqi va boshqa savollar haqida gapirar ekan, aktrisa quyidagicha izoh berdi: — Xadicha onamiz Rasululloh (s.a.v.) bilan turmush qurganlarida 40 yoshda bo‘lganlar, Payg‘ambarimiz esa 25 yoshda edilar. Bu holat sunnatdir.
Demak, muhabbatda yoshning ahamiyati yo‘q. Muhim jihat — insonlarning qalban birlashishi.
Chunki ruhlar Al-Misoq davridan teng yaratilgan. Agar kimdir bizning yoshimizga e’tiroz bildirayotgan bo‘lsa, bu savolni Alloh va Uning Rasuliga yo‘llasin, — dedi Feruza Normatova.
Aktrisaning bu fikrlari ijtimoiy tarmoqlarda keng muhokama qilindi. Ko‘plab foydalanuvchilar uning ochiqligi va e’tiqodiga ijobiy baho berib, uni qo‘llab-quvvatladilar.
