Dilnoza Kubayeva: "Eng qimmat aktrisa emasman"
O‘zbekistonda xizmat ko‘rsatgan artist Dilnoza Kubayeva yaqinda o‘z ijodi, gonorari va san’atdagi haqiqiy qadriyatlar haqida fikr bildirdi. Bu haqda Zamin.uz xabar berdi.
U ko‘pchilik tomonidan “eng qimmat gonorar oladigan aktrisa” sifatida tanilganini, ammo bu fikr haqiqatdan uzoq ekanini ta’kidladi. — Meni “eng qimmat aktrisa” deyishadi.
Aslida, davlat buyurtmasi asosida suratga olinadigan filmlarda gonorarlar unchalik yuqori emas. Bir film uchun atigi 300 ming so‘mdan ortiq pul olganman.
Bu holat meni juda qiynagan edi, ammo uzoq vaqt bu haqda ochiq gapirmadim. Keyinchalik Telegram’dagi jonli efirlar jarayonida savollar ko‘payib ketgani sababli beixtiyor bu haqda aytib yubordim, — dedi aktrisa.
Dilnoza Kubayevaning aytishicha, ushbu masala e’tiborsiz qolmagan. Adliya vazirligi mutaxassislari uning huquqlariga e’tibor qaratgan.
Aktrisaning so‘zlariga ko‘ra, bu haqda hatto uning akasiga qo‘ng‘iroq qilib, masalani muhokama qilishgan. — Buni eshitib juda xursand bo‘ldim.
Demak, ijodkorlarning manfaatlarini himoya qiladigan odamlar bor ekan, — deydi u. Shuningdek, aktrisa jamiyatda san’atkorlar haqida noto‘g‘ri tasavvur mavjudligini aytib o‘tdi.
— Ko‘pchilik san’atkorlar katta pul topadi deb o‘ylaydi. Agar kinoda haqiqatan ham katta daromad bo‘lganida edi, men to‘ydan-to‘yga yurmasdim.
Biz ishimizni pullar uchun emas, mehr bilan qilamiz, — deb qo‘shimcha qildi Dilnoza Kubayeva.
