Nobel sovrindori Jeyms Uotson 97 yoshida vafot etdi

Dunyo ilm-fan jamoasi yana bir buyuk olimni yo‘qotdi. Bu haqda Zamin.uz xabar berdi.

DNK tuzilishini kashf etgan, Nobel mukofoti sohibi, amerikalik biolog Jeyms Uotson 97 yoshida vafot etdi. Bu haqda “The New York Times” xabar berdi.

Ma’lumotlarga ko‘ra, Jeyms Uotson Nyu-Yorkdagi hospisda hayotdan ko‘z yumgan. Olimning o‘g‘li otasining vafotini rasman tasdiqlagan.

Jeyms Uotson 1953-yilda britaniyalik biofizik Frensis Krik bilan hamkorlikda DNKning ikki spiralli tuzilishini aniqlashga muvaffaq bo‘lgan. Bu kashfiyot ilm-fan tarixidagi eng muhim yangiliklardan biri sifatida tan olindi.

Ushbu yutuq uchun Uotson 1962-yilda Nobel mukofotiga sazovor bo‘lgan. Uotson 1990-yilda “Inson genomi” loyihasini boshqarib, DNK xaritasini yaratishda katta hissa qo‘shgan.

U butun hayoti davomida biologiya va genetika sohasida muhim ilmiy meros qoldirdi. Shunga qaramay, 2019-yilda irqiy tafovutlar haqidagi bahsli fikrlari sababli uning barcha faxriy unvonlari bekor qilingan edi.

Jeyms Uotson zamonaviy genetikaning asoschilaridan biri sifatida ilm-fan tarixida abadiy qoladi.