Katrina Kaif va Viki Kaushal o‘g‘il farzandli bo‘ldi
Hind kinosining mashhur yulduzi, 42 yoshli Katrina Kaif ilk bor ona bo‘ldi. Bu haqda Zamin.uz xabar berdi.
Uning turmush o‘rtog‘i, aktyor Viki Kaushal bilan birgalikda 2025-yil 7-noyabr kuni o‘g‘il farzandli bo‘lishdi. Bu haqda “India Today” nashri xabar berdi.
Katrina Kaif ushbu quvonchli xabarni o‘zining Instagram sahifasida muxlislari bilan bo‘lishdi. Aktrisa postida shunday deb yozgan: “Bizning bir bo‘lagimiz, quvonchimiz dunyoga keldi!
Cheksiz muhabbat va minnatdorchilik bilan o‘g‘limizning tug‘ilganini e’lon qilamiz. Katrina va Viki”.
Viki Kaushalning ukasi Sanni Kaushal ham ushbu xabarni tasdiqladi. U o‘z sahifasida “Men amaki bo‘ldim” deb yozib, bu quvonchni o‘z muxlislari bilan bo‘lishgan.
Katrina Kaifning homiladorligi haqidagi mish-mishlar bir necha oy avval, sentyabr oyida paydo bo‘lgan edi. Juftlik bu haqda rasmiy bayonot bermagan bo‘lsa-da, muxlislar aktrisaning suratlari va intervyularidagi ayrim o‘zgarishlardan shubhalangan edilar.
Katrina Kaif Bollivudning eng mashhur aktrisalaridan biri bo‘lib, u “Josuslar”, “Tezlik”, “Ek Tha Tiger” kabi filmlardagi rollari bilan tanilgan. 2021-yil dekabr oyida u Viki Kaushal bilan Rajaston shtatida o‘tkazilgan an’anaviy to‘y marosimida turmush qurgan edi.
Aktrisa 1983-yilda Gonkongda tug‘ilgan. Uning otasi hindistonlik, onasi esa ingliz millatiga mansub.
Katrina 14 yoshida modellik faoliyatini boshlagan va 2003-yilda “Bum” filmi orqali Bollivudda debyut qilgan. Viki Kaushal esa 1988-yilda Mumbayda tug‘ilgan.
U Rajiv Gandi texnologiya institutini tamomlagan va 2012-yilda “Vasseypur to‘dalari” filmi orqali aktyorlik faoliyatini boshlagan. Eslatib o‘tamiz, Katrina Kaif 2013-yilda Shohrux Xon bilan birgalikda Ginnes rekordlar kitobiga eng badavlat aktrisa sifatida kiritilgan.
O‘sha paytda uning yillik daromadi taxminan 10 million AQSH dollarini tashkil etgan.
