Teylor Svift musiqada yangi tarixiy rekord o‘rnatdi

Dunyoga mashhur amerikalik qo‘shiqchi Teylor Svift musiqa sohasida yangi tarixiy rekord o‘rnatdi. Bu haqda Zamin.uz xabar berdi.

ChartMasters global reytingining ma’lumotlariga ko‘ra, Svift hozirda musiqa sanoatida eng muvaffaqiyatli va tijoriy jihatdan samarali ijodkorlardan biri sifatida tan olingan. Sviftning umumiy ko‘rsatkichi 253,4 million EAS (ekvivalent albom sotuvi) ga yetib, bu borada u pop musiqasi qirolichasi hisoblangan Madonnani ham ortda qoldirdi.

U Madonnadan 351 ming albomlik farq bilan o‘zib ketdi. Hozirda Teylor Svift dunyo tarixidagi eng ko‘p sotilgan ijodkorlar orasida beshinchi o‘rinni egallab turibdi.

Undan oldinda faqat The Beatles, Maykl Jekson, Elvis Presli va Queen kabi afsonaviy musiqachilar joylashgan. Bundan tashqari, Svift 2022-yilda Billboard Hot 100 reytingining birinchi o‘ntaligini to‘liq egallagan yagona ijodkor bo‘lib tarixga kirgan.

Shuningdek, u so‘nggi o‘n yil davomida vinil plastinkalar sotuvida yetakchilikni saqlab kelmoqda. Sviftning “The Eras Tour” gastrol turnesi ham rekord daromad keltirdi.

2023–2024-yillar davomida o‘tkazilgan 149 ta konsertdan 2 milliard dollardan ortiq daromad olindi. Forbes ma’lumotlariga ko‘ra, Teylor Sviftning boyligi 1,6 milliard dollarga yetgan bo‘lib, u shou-biznesda yetakchi ayollardan biri sifatida baholanmoqda.

Svift nafaqat musiqada, balki butun shou-biznes sohasida zamonamizning eng ta’sirli ayollaridan biri sifatida e’tirof etilmoqda.