Tom Kruz faxriy "Oskar" mukofoti bilan taqdirlandi
Gollivudning mashhur aktyori Tom Kruz kino sanoatiga qo‘shgan ulkan hissasi uchun faxriy "Oskar" mukofotiga loyiq deb topildi. Bu haqda Zamin.uz xabar berdi.
Variety nashrining xabariga ko‘ra, mukofot topshirish marosimi 2025-yil 16-noyabr kuni Governors Awards tadbiri doirasida o‘tkazilgan. Mukofotni qabul qilish vaqtida Tom Kruz o‘z nutqida kino san’atiga bo‘lgan cheksiz muhabbatini ta’kidladi.
U: "Film yaratish bu mening kasbim emas, bu men kim ekanligimdir", deb so‘z boshladi. Aktyorning fikriga ko‘ra, kino insoniyatni birlashtiruvchi kuchga ega bo‘lib, odamlarni bir-birini tushunishga, farqlarni qadrlashga va umumiy insoniy qadriyatlarni anglashga undaydi.
"Biz qayerdan bo‘lishimizdan qat’i nazar, kinoteatrda birga kulamiz, birga hayajonlanamiz va birga umid qilamiz – san’atning kuchi shunda. Shu sababli bu mukofot men uchun juda katta ahamiyatga ega", dedi Kruz.
U, shuningdek, bolaligida ilk bor qorong‘i kinoteatr zalida nur chizig‘ini ko‘rganini eslab, bu hodisa uning dunyoqarashini o‘zgartirganini qo‘shimcha qildi. Mazkur kechada faxriy "Oskar" mukofotlari boshqa soha vakillariga ham topshirildi.
Jumladan, taniqli xoreograf Debbi Allen va sahna bezatuvchisi Uinn Tomas ham ushbu yuksak e’tirofga sazovor bo‘ldi.
