Klimtning portreti auksionda 236,4 mln dollarga sotildi
Avstriyalik mashhur rassom Gustav Klimtning “Elizabet Lederer portreti” nomli asari Nyu-Yorkdagi Sotheby’s auksionida 236,4 million AQSh dollariga sotildi. Bu haqda Zamin.uz xabar berdi.
Bu summa bilan mazkur asar zamonaviy san’at tarixida eng qimmat narxda sotilgan san’at asari sifatida rekord o‘rnatdi. Bloomberg xabariga ko‘ra, ushbu asar Estee Lauder kompaniyasining sobiq rahbari, marhum milliarder Leonard Lauder kolleksiyasiga tegishli bo‘lgan.
Lauder kolleksiyasi umumiy hisobda 24 lotdan iborat bo‘lib, jami 527,5 million dollarlik daromad keltirdi. Biroq, aynan Klimtning mazkur kartinasi kechki savdoning eng muvaffaqiyatli loti sifatida e’tirof etildi.
Asarning boshlang‘ich narxi 150 million dollar bo‘lgani holda, u nihoyat 236,4 million dollarga sotildi. “Elizabet Lederer portreti” 1914-yilda chizilgan bo‘lib, Klimt ijodining so‘nggi davriga mansub.
Unda Xitoy imperatorlarining libosini eslatuvchi oq kiyim kiygan 20 yoshli Elizabet Lederer tasvirlangan. Portret Ikkinchi jahon urushi yillarida natsistlar tomonidan musodara qilingan, lekin 1948-yilda oila a’zolariga qaytarilgan.
1985-yilda Leonard Lauder ushbu portretni o‘z shaxsiy kolleksiyasiga qo‘shgan. Bugungi kunda esa bu asar dunyodagi eng qimmat zamonaviy san’at namunalaridan biriga aylangan.
Gustav Klimt 1918-yilda vafot etgan bo‘lsa-da, uning ijodi hanuzgacha san’at ixlosmandlari tomonidan yuksak qadrlanmoqda.
