Diyora Keldiyorova: "Sport hayotimni o‘zgartirdi"

O‘zbekistonlik taniqli dzyudochi, ikki karra Osiyo chempioni va uch karra Jahon chempionati sovrindori Diyora Keldiyorova yaqinda Instagram ijtimoiy tarmog‘ida bolalikdagi hayoti va erishgan yutuqlari haqida samimiy so‘zlab berdi. Bu haqda Zamin.uz xabar berdi.

Ushbu video qisqa vaqt ichida keng ommaga tarqalib, ko‘pchilikning qalbini larzaga soldi. Diyora videoda o‘zining bolalikdagi qiyinchiliklari haqida shunday deydi: "Men qish faslini yoqtirmasdim, chunki krossovkam yo‘q edi.

Yugurish uchun rulon paket kiyib mashq qilardim. Hayotimni o‘zgartiradigan yagona narsa sport edi.

Aynan sport menga kuch berdi va taqdirimni o‘zgartirdi." Uning so‘zlariga ko‘ra, u oddiy ishchi oilasida tug‘ilib, mehnat bilan ulg‘aygan. "Ota-onam doim: 'Grantga kirsang, o‘qitamiz', der edi.

Sport esa menga nafaqat grantga kirishda, balki chet elga chiqishda va hayotda katta maqsadlar qo‘yishda yordam berdi," deydi sportchi. Diyora o‘z chiqishida barcha ayollar va qizlarga quyidagi ilhomli so‘zlarni yo‘lladi: "Hayotingizda moddiy imkoniyatlar kam bo‘lishi mumkin, ammo ichingizdagi kuch nihoyatda katta.

Bu kuchni bizga Yaratgan bergan. O‘zingizga ishoning va oldinga dadil qadam tashlang." Diyoraning samimiy va ta’sirli so‘zlari ko‘plab odamlarning qalbini zabt etdi.

Uning ilhomlantiruvchi hikoyasi ijtimoiy tarmoqlarda keng e’tirof etilib, minglab qo‘llab-quvvatlov izohlari bilan kutib olindi.