Saida Mirziyoyeva Doha kinofestivalida O‘zbekiston san’atini tanitdi
Prezident Administratsiyasi rahbari Saida Mirziyoyeva 22-noyabr kuni Qatar poytaxti Doha shahrida o‘tkazilgan nufuzli kino festivalida ishtirok etdi. Bu haqda Zamin.uz xabar berdi.
Mazkur tashrif san’at va madaniyat ahli e’tiborini tortib, O‘zbekistonning zamonaviy san’at sohasidagi faol ishtirokini yana bir bor namoyon qildi. Ushbu festival mustaqil va mualliflik yo‘nalishida ishlayotgan rejissyorlar uchun muhim platforma sanaladi.
Saida Mirziyoyeva bu maydonni yangi g‘oyalar, dadil badiiy yondashuvlar va ijodiy erkinlikni ifoda etish imkonini beruvchi qimmatli makon sifatida ta’kidladi. Festival dasturi turli mamlakatlardan taqdim etilgan filmlarni o‘z ichiga olgan bo‘lib, yosh ijodkorlar va mahalliy kinochilar uchun alohida e’tibor qaratilgan.
Saida Mirziyoyeva o‘z telegram-kanalida zamonaviy kinoning nafaqat san’at, balki jamiyatdagi kayfiyat, muammolar va umidlarni ifodalovchi kuchli vosita ekanini yozib o‘tdi. Shuningdek, u Qatarning madaniy markazlarida o‘tkazilgan tadbirlar bilan tanishdi.
Tashrif davomida Fashion Trust Arabia (FTA) jamg‘armasi faoliyati bilan ham yaqindan tanishib, mazkur tashabbusning Yaqin Sharq va Shimoliy Afrika mintaqasidagi iste’dodli dizaynerlarni qo‘llab-quvvatlashga qaratilganini qayd etdi. Mirziyoyeva M7 madaniyat markazidagi Threads of Impact ko‘rgazmasiga ham tashrif buyurdi.
Unda O‘zbekiston dizaynerlarining qo‘l mehnati va milliy an’analarini aks ettiruvchi “Woven Legacies: Uzbekistan’s Living Heritage” ekspozitsiyasi katta qiziqish uyg‘otgan. U bu kabi loyihalar milliy merosni jahon sahnasida namoyish etishda muhim o‘rin tutishini ta’kidladi.
Shuningdek, Saida Mirziyoyeva mashhur me’mor Rem Koolhaas va Samir Bantal rahbarligida tashkil etilgan “Countryside: A Place to Live, Not to Leave” nomli ko‘rgazmani ham tomosha qildi. Ushbu ko‘rgazma qishloq hayotining zamonaviy qiyofasi, uni saqlab qolish va rivojlantirish masalalariga bag‘ishlangan bo‘lib, Mirziyoyeva bu g‘oyalarni katta qiziqish bilan kuzatgani ma’lum qilindi.
