Madina Bonu "Silk Way Star"da ikkinchi o‘rinni oldi
O‘zbekistonlik xonanda Madina Bonu Adilova xalqaro vokal televizion loyihasi "Silk Way Star" finalida ikkinchi o‘rinni egalladi. Bu haqda Zamin.uz xabar berdi.
Final bosqichi 23-noyabr kuni Qozog‘istonning Ostona shahrida o‘tkazildi. Mazkur loyiha Qozog‘iston va Xitoy o‘rtasidagi hamkorlik doirasida amalga oshirilgan yirik media-tashabbus bo‘lib, u Qozog‘iston prezidenti Qasim-Jo‘mart Toqayev hamda Xitoy Xalq Respublikasi rahbari Si Szinpin tomonidan imzolangan kelishuv asosida tashkil etilgan.
Musobaqa dastlab 12 davlat vakillarini jamlagan bo‘lsa, final bosqichiga faqat yetti ijrochi yetib kelgan. Loyiha davomida tomoshabinlar tomonidan jami 508,2 ming ovoz berildi.
Madina Bonu Adilova 85,4 ming ovoz to‘plab, ikkinchi o‘rinni qo‘lga kiritdi. Birinchi o‘rin mo‘g‘ulistonlik Mishel Jozefga nasib etdi.
U 112,2 ming ovoz to‘plab g‘olib bo‘ldi. Uchinchi o‘rinni esa Xitoy vakili Chjan Xe Syuan 73,6 ming ovoz bilan egalladi.
Malayziyalik Yazmin Aziz ham 73,6 ming ovoz to‘plab, keyingi o‘rinni oldi. Armanistonlik Saro Gevorgyan esa 73,1 ming ovoz bilan musobaqani yakunladi.
Madina Bonu Adilovaning ushbu yutuqlari O‘zbekiston san’atining xalqaro miqyosda e’tirof etilayotganidan dalolat beradi. Bu kabi muvaffaqiyatlar milliy san’atimizning rivojlanishiga hissa qo‘shmoqda.
