Xonzoda: "Oilada mehr va hurmat muhim"

Xonanda va aktrisa Xonzoda Do‘stova yaqinda NavoTV ko‘rsatuvida mehmon bo‘lib, oilaviy munosabatlar va o‘z hayotiy tajribalari haqida ochiq fikrlarini bildirdi. Bu haqda Zamin.uz xabar berdi.

U suhbat davomida oilada tinchlik va hurmatni saqlash uchun muhim bo‘lgan tamoyillar haqida so‘z yuritdi. Xonzoda o‘z oilasidagi munosabatlar haqida gapirar ekan, aka-uka hayotiga aralashmaslik tamoyilini alohida ta’kidladi.

U shunday deydi: “Men akamning rafiqasini o‘z opamdek qabul qilaman. Agar ular o‘rtasida kelishmovchilik bo‘lsa, akamga: ‘Aka, ayb sizda’, deyman.

Chunki oilada mehr va hurmatni saqlash muhim. Kimga mehr bersangiz, u ham sizga javoban mehr beradi.” Shuningdek, xonanda o‘z oilasidagi iliq munosabatlar haqida amaliy misol keltirdi: “Akam va kenayim turmush qurganlariga 6–7 yil bo‘ldi.

Shu vaqt ichida ular bilan hech qachon janjallashmaganmiz. O‘zimga biror narsa olsam, ularga ham sovg‘a qilishni unutmayman.” Xonzoda oilaviy masalalarda haddan tashqari aralashuvning salbiy oqibatlari haqida ham fikr bildirdi: “Ba’zi qizlar akasi yoki ukasining hayotiga aralashib, oilani buzadi.

Keyin esa o‘zi turmushga chiqib, shu narsalarni boshidan o‘tkazadi. Kenayim menga: ‘Xonzoda, siz boshqachasiz, mehribon va yaxshisiz.

Sizga ham o‘zingizga o‘xshagan yaxshi qaynopalar va qaynsingillar uchrasin’, derdilar. Taqdir taqozosi bilan mening qaynopam va qaynsinglim ham meni juda yaxshi ko‘rishadi.” Xonzoda Do‘stova ushbu suhbat orqali oilada mehr, hurmat va samimiylikning naqadar muhim ekanini ta’kidladi.

U oila hayotida tinchlik va iliqlikni saqlash bo‘yicha o‘z tajribasini muxlislari bilan o‘rtoqlashdi.