Xonzoda: "Aka-uka oilasiga aralashmang"
Xonanda va aktrisa Xonzoda Do‘stova yaqinda NavoTV ko‘rsatuvida mehmon bo‘lib, o‘z oilaviy munosabatlari haqida samimiy fikrlarini bildirdi. Bu haqda Zamin.uz xabar berdi.
U oiladagi tinchlik va hurmatni saqlashning muhim jihatlari haqida gapirar ekan, aka-uka hayotiga aralashmaslikni asosiy tamoyil sifatida ko‘rsatdi. Xonzoda o‘z fikrlarini quyidagicha izohlagan: “Men akamning rafiqasini, ya’ni kenayimni o‘zimning opamdek qabul qilganman.
Agar ular o‘rtasida kelishmovchilik bo‘lsa, har doim akamni ogohlantiraman: ‘Aka, ayb sizda, kenayimni xafa qilmang’, deb maslahat beraman. Bu bilan oiladagi mehr va hurmatni saqlashga harakat qilaman.
Chunki kimga mehr bersangiz, u ham sizga mehr bilan javob beradi.” Xonzoda o‘z oilasidagi iliq munosabatlarni misol qilib keltirdi: “Akam va kenayim turmush qurishganiga olti-yetti yil bo‘ldi, lekin biz hech qachon bir-birimizga qarshi chiqmaganmiz. O‘zimga biror narsa olsam, ularga ham albatta sovg‘a qilaman.
Bu o‘zaro hurmat va mehrni yanada mustahkamlaydi.” Shuningdek, Xonzoda oilaviy masalalarga aralashishning salbiy oqibatlari haqida ham to‘xtaldi: “Ba’zi qizlar akasi yoki ukasining oilaviy hayotiga aralashib, ularning baxtini buzadi. Keyin esa o‘zi turmushga chiqib, shunday vaziyatlarni boshdan kechiradi.
Kenayim menga doim: ‘Siz boshqacha, mehribon va samimiy odamsiz. Sizga ham o‘zingizga o‘xshagan yaxshi qaynopalar va qaynsingillar uchrasin’, deb duo qilardi.
Taqdir taqozosi bilan, mening qaynopam va qaynsinglim meni haqiqatan ham juda yaxshi ko‘rishadi.” Xonzoda Do‘stova oila hayotida mehr, hurmat va samimiylikning o‘rni juda muhim ekanini ta’kidlab, ushbu tamoyillarni saqlash orqali oilada tinchlik va iliqlikni ta’minlash mumkinligini aytib o‘tdi.
