Hindistonda 9 million dollarlik dabdabali to‘y bo‘lib o‘tdi

Hindistonning Udaypur shahrida mamlakatdagi ikkinchi eng badavlat oilaning qizi Netra Mantena turmush qurdi. Bu haqda Zamin.uz xabar berdi.

Netra farmatsevtika sanoati magnatining qizi bo‘lib, IT sohasidagi tadbirkor Vamsi Garidajuga turmushga chiqdi. Mazkur dabdabali to‘y marosimida taniqli xalqaro yulduzlar ishtirok etdi.

Jumladan, mashhur qo‘shiqchi Jennifer Lopes, Bollivudning taniqli aktyorlari va Cirque du Soleil jamoasi o‘z chiqishlari bilan mehmonlarni xushnud etdi. Shuningdek, marosimda AQShning sobiq prezidenti Donald Trampning o‘g‘li ham qatnashgani ma’lum bo‘ldi.

To‘y hashamati va mehmonlari bilan Hindistondagi eng esda qolarli ijtimoiy tadbirlardan biriga aylandi. Tadbirning umumiy narxi taxminan 9 million dollarga teng bo‘lgani aytilmoqda.

Ushbu marosim nafaqat Hindiston, balki xalqaro miqyosda ham katta e’tibor qozondi.