Pavel Durov sog‘lom hayot siri bilan bo‘lishdi
Telegram asoschisi Pavel Durov sog‘lom hayot tarzi borasidagi qarashlari bilan yana jamoatchilik e’tiborini tortdi. Bu haqda Zamin.uz xabar berdi.
U o‘zining oddiy, ammo qat’iy odatlari tufayli sog‘lom turmush kechirish va uzoq muddat yaxshi salomatlikni saqlash mumkinligini ta’kidladi. Ijtimoiy tarmoqlarda berilgan “Nega ba’zi odamlar kamdan-kam xastalikka chalinadi?” degan savolga Durov qisqa va aniq javob berdi.
Durovning ta’kidlashicha, kuchli sog‘liq va barqaror immunitetning asosiy omillari quyidagilarga bog‘liq: kuniga kamida 8 soat sifatli uyqu, tabiiy va toza mahsulotlardan iborat ovqatlanish, muntazam jismoniy mashqlar, ruhiy barqarorlikni saqlash, tamaki va alkogoldan butunlay voz kechish, shuningdek, zarurat bo‘lmaganda dorilar iste’mol qilmaslik. Ma’lum bo‘lishicha, Durov ushbu qoidalarga 20 yildan buyon qat’iy amal qilib keladi.
U alkogol, sigaret va kofeinli ichimliklarni umuman iste’mol qilmaydi. Shuningdek, uning kuni odatda sovuq suvda cho‘milish bilan boshlanadi va dushdagi suv harorati deyarli nol darajaga yaqin bo‘ladi.
Har kuni kamida bir soat jismoniy mashq bajarish va uyqu rejimiga qat’iy rioya qilish orqali u 41 yoshida ham yosh va sog‘lom ko‘rinishini saqlab qolgan. Durovning so‘zlariga ko‘ra, u oxirgi marta 15 yil avval shamollagan.
Uning bu fikrlari ijtimoiy tarmoqlarda keng muhokamalarga sabab bo‘ldi. Ko‘plab foydalanuvchilar ushbu maslahatlardan ruhlanib, zararli odatlarni tark etishga qaror qilganini yozmoqda.
Ammo ayrimlar bunday turmush tarzini amalga oshirish nafaqat kuchli iroda, balki katta moliyaviy imkoniyatlarni ham talab qilishi mumkinligini hazilomuz tarzda ta’kidlab o‘tishdi.
