Samarqandda xalqaro haykaltaroshlik simpoziumi boshlandi
Samarqand shahrida "Samarqand-2025" IV Xalqaro haykaltaroshlik simpoziumi boshlandi. Bu haqda Zamin.uz xabar berdi.
Ushbu tadbir CITES CoP20 konferensiyasi doirasida o‘tkazilib, ekologik madaniyatni targ‘ib qilish, xalqaro ijodiy hamkorlikni kuchaytirish va shahar muhitini san’at orqali yanada obodonlashtirishga qaratilgan. Joriy yilda simpoziumda ishtirok etish uchun 73 mamlakatdan 150 nafar haykaltarosh tomonidan 300 dan ortiq ijodiy eskizlar taqdim etildi.
Ularning orasidan 17 ta loyihalar tanlab olinib, haykallar yaratish jarayoni boshlandi. Ummon, Eron, Turkiya, Xitoy, Hindiston, Buyuk Britaniya, Gruziya, Yaponiya va O‘zbekiston kabi davlatlardan kelgan 20 ga yaqin ustalar marmar haykallar ustida ishlamoqda.
Tayyor bo‘lgan haykallar Samarqand va Toshkent shaharlaridagi bog‘larga o‘rnatiladi. Ishtirokchilar uchun "Jannat makon" bog‘ida maxsus ustaxonalar va ish uchun zarur sharoitlar tashkil qilingan.
7-dekabrga qadar Xalqaro turizm va madaniy meros universiteti "Ipak yo‘li" hamda Samarqand Turizm akademiyasida uchrashuvlar va mahorat darslari o‘tkazilishi rejalashtirilgan. CITES CoP20 konferensiyasi ishtirokchilari simpoziumni kuzatish va nodir o‘simlik hamda hayvonot turlariga bag‘ishlangan asarlar ko‘rgazmasini tomosha qilish imkoniyatiga ega bo‘ladilar.
Bu tadbir xalqaro hamkorlikni mustahkamlash va san’atni keng targ‘ib qilishda muhim ahamiyat kasb etadi.
