Samarqandda xalqaro haykaltaroshlik simpoziumi boshlandi
Samarqand shahrida “Samarqand-2025” IV Xalqaro haykaltaroshlik simpoziumi boshlandi. Bu haqda Zamin.uz xabar berdi.
Ushbu tadbir CITES CoP20 doirasida o‘tkazilib, uning asosiy maqsadi ekologik madaniyatni targ‘ib qilish, xalqaro ijodiy hamkorlikni rivojlantirish va shahar muhitini san’at orqali yanada go‘zal qilishdan iborat. Bu yilgi simpoziumda ishtirok etish uchun 73 davlatdan 150 nafar haykaltarosh tomonidan 300 dan ortiq eskizlar taqdim etildi.
Ular orasidan 17 ta eng yaxshi asar saralab olindi. Ummon, Eron, Turkiya, Xitoy, Hindiston, Buyuk Britaniya, Gruziya, Yaponiya va O‘zbekiston kabi mamlakatlardan kelgan 20 ga yaqin mahoratli ustalar marmardan haykallar yaratmoqda.
Ushbu san’at asarlari keyinchalik Samarqand va Toshkentdagi bog‘larda o‘rnatilishi rejalashtirilgan. Ishtirokchilar uchun Samarqanddagi “Jannat makon” bog‘ida maxsus ustaxonalar va barcha zarur sharoitlar tashkil etilgan.
7 dekabrga qadar “Ipak yo‘li” Xalqaro turizm va madaniy meros universiteti hamda Samarqand Turizm akademiyasida mahorat darslari va uchrashuvlar o‘tkazilishi ko‘zda tutilgan. Shuningdek, CITES CoP20 tadbiri ishtirokchilari simpozium jarayonlarini kuzatishlari va noyob o‘simliklar hamda hayvonot turlariga bag‘ishlangan asarlar ko‘rgazmasini tomosha qilishlari mumkin.
