Jahongir Otajonovning “Moda” klipi keng muhokamada
29-noyabr kuni Jahongir Otajonovning yangi “Moda” qo‘shig‘i va unga ishlangan klipi YouTube platformasida taqdim etildi. Bu haqda Zamin.uz xabar berdi.
Ushbu klip tomoshabinlar orasida katta qiziqish uyg‘otib, keng muhokama qilindi. Klipda san’at va kinematografiyaga xos noan’anaviy uslublar qo‘llanilib, tomoshabinlarni o‘ziga jalb qildi.
Klip rejissori Sardor Faxriddinov bo‘lib, u avval ham Jahongir Otajonov bilan hamkorlik qilib, yuqori darajadagi video ishlanmalar yaratgan edi. Bu safar klipda zamonaviy estetika va sirli uslublar birlashib, kinematografik ishoralarni yanada boyitdi.
Klipning boshida "Frankenshteyn" personajiga ishora qilinib, zamonaviy modaga bo‘lgan qiziqish tanqid qilinadi. "Frankenshteyn" obrazida insonning o‘zligini yo‘qotishi timsoli aks ettirilgan.
Bundan tashqari, klipda qadimiy san’at va yunon mifologiyasiga murojaat qilinadi. Afrodita haykali orqali go‘zallik va sevgi haqidagi qadimiy tushunchalar tasvirlanib, zamonaviy tendensiyalar tanqid ostiga olinadi.
Shuningdek, klipda “red flag” tendensiyasiga e’tibor qaratilib, zombi apokalipsisi sahnalari orqali dolzarb ijtimoiy mavzular yoritiladi. Bu orqali hozirgi kunda ijtimoiy tarmoqlarda mashhur bo‘lgan “red flag” belgisi va uning ma’nosi aks ettirilgan.
Umuman olganda, klip o‘zining chuqur mazmuni, zamonaviy va klassik san’atni uyg‘unlashtirgan uslubi bilan tomoshabinlar e’tiborini tortmoqda.
