“Hayvonlar shaharchasi 2” (“Zootopia 2”) animatsion filmi premera haftasida jahon bo‘ylab 556 million dollarga yaqin daromad to‘pladi. Bu haqda Zamin.uz xabar berdi.
Ushbu ko‘rsatkich bilan film bir nechta rekordlarni yangiladi va AQShdan tashqarida eng ko‘p daromad keltirgan animatsion kartinaga aylandi. Bu haqda Deadline nashri xabar berdi.
Hozirgi kunda “Hayvonlar shaharchasi 2” jahon bo‘ylab eng yaxshi start olgan filmlar orasida to‘rtinchi o‘rinni egallamoqda. Birinchi uch o‘rin esa Disney kompaniyasiga tegishli filmlarga mansub: “Qasoskorlar: Final” (1,2 milliard dollar), “Qasoskorlar: Cheksizlik jangi” (640,5 million dollar) va “O‘rgimchak odam: Uyga yo‘l yo‘q” (600,5 million dollar).
Filmning ikkinchi qismida bosh qahramonlar – Judi va Nik politsiyachilik faoliyatini davom ettiradi. Ular o‘zaro munosabatlarini mustahkamlash uchun juftlik terapiyasidan o‘tadi.
Ushbu terapiyada ularga kvokka Fazzbi ismli yangi qahramon yordam beradi. Shu jarayonda ular yangi vazifani bajarishga majbur bo‘ladi: zaharli ilon Garini to‘xtatib, hayvonlar megapolisini qutqarish.
Ma’lumot uchun, “Hayvonlar shaharchasi” filmi ilk bor 2016-yilda Walt Disney Animation Studios tomonidan yaratilgan. Film voqealari Zutopiya nomli zamonaviy shaharda kechadi.
Bu shahar turli hayvonlarning birgalikda tinch va uyg‘un hayot kechiradigan joyi sifatida tasvirlangan. Animatsion film o‘zining original g‘oyasi va qiziqarli voqealari bilan tomoshabinlar e’tiborini qozongan.
