Jeki Chan filmi O‘zbekistonda suratga olinishi mumkin
O‘zbekistonda Jeki Chan ishtirokidagi film suratga olinishi mumkinligi haqida ma’lumot berildi. Bu haqda Zamin.uz xabar berdi.
Xususan, kelajakda suratga olinishi rejalashtirilayotgan "Xudoning zirhlari: Ultimatum" filmi sahnalarining bir qismi O‘zbekiston hududida tasvirga tushirilishi ehtimoli mavjud. Bu haqda Qozog‘istonning Salem Entertainment media kompaniyasi xabar berdi.
Kompaniyaning ma’lum qilishicha, ular "O‘zbekfilm" kinokompaniyasi va O‘zbekiston Kinematografiya agentligi bilan samarali uchrashuv o‘tkazishgan. Uchrashuv davomida filmning ayrim qismlarini O‘zbekistonda suratga olish masalasi muhokama qilingan va bu borada umid bildirilgan.
Shuningdek, 2026 yil oktyabr oyida filmning asosiy qismlari Qozog‘iston hududida suratga olinishi rejalashtirilayotgani aytib o‘tildi. Salem Entertainment kompaniyasining qayd etishicha, bu loyiha Qozog‘iston kinematografiyasidagi eng yirik loyihalardan biri bo‘lishi kutilmoqda.
"Xudoning zirhlari" filmlar seriyasi Jeki Chan ishtirokidagi mashhur sarguzasht janriga oid asarlardan biri hisoblanadi. Ushbu seriyada Jeki Chan Osiyo Burguti laqabli artefakt ovchisining qiyofasida namoyon bo‘lib, qadimiy yodgorliklarni qidirish, hazil va akrobatik sahnalar bilan tomoshabinlarni o‘ziga jalb etadi.
Filmlar seriyasining birinchi qismi 1986 yilda taqdim etilgan bo‘lib, keyinchalik uning bir necha davomiy qismlari suratga olingan.
