Shohrux Xon va Kajol haykali Londonda o‘rnatildi
Bollivudning taniqli aktyorlari Shohrux Xon va Kajolning bronza haykali Londondagi “Leicester Square” maydonida o‘rnatildi. Bu haqda Zamin.uz xabar berdi.
Bu haykal mashhur “O‘g‘irlanmagan kelin” filmining 30 yilligi munosabati bilan yaratilgan bo‘lib, unda Raj va Simranning kino tarixiga kirgan raqs sahnasi aks ettirilgan. Ma’lum qilinishicha, ushbu maydon ilgari ham bir qator mashhur filmlar qahramonlariga bag‘ishlangan haykallar bilan boyitilgan.
Jumladan, “Garri Potter”, “Meri Poppins” va “Paddington sarguzashtlari” kabi loyihalarning obrazlari ham bu yerda aks ettirilgan. Tantanali ochilish marosimida “Yash Raj Films” kompaniyasi rahbari Akshay Vidhani va “Heart of London Business Alliance” tashkiloti bosh ijrochi direktori Ros Morgan ishtirok etdi.
Shohrux Xon o‘z nutqida “O‘g‘irlanmagan kelin” filmi uning hayotida muhim o‘rin tutishini ta’kidladi. “Bu film samimiy muhabbat va uning yo‘lida uchraydigan sinovlar haqida hikoya qiladi.
30 yil davomida filmning sevilib tomosha qilinayotgani ham shundan dalolatdir”, — dedi aktyor. Kajol esa ushbu damni “tariximiz yana bir bor jonlandi” deb baholab, filmning avlodlar tomonidan sevib tomosha qilinayotganini qayd etdi.
Ma’lum bo‘lishicha, “Leicester Square” ushbu film uchun ham ramziy ahamiyat kasb etadi, chunki filmning dastlabki kadrlaridan birida Raj va Simran aynan shu joyda yo‘llarini yo‘qotib, keyin yana uchrashgan edi.
