Obid Nasriddinov opasi uchun uy sovg‘a qildi
Aktyor Obid Nasriddinov yaqinda opasi uchun uy sovg‘a qilganini ma’lum qildi. Bu haqda Zamin.uz xabar berdi.
U bu haqda o‘z fikrlarini bildirib, bunday qarorga nima sabab bo‘lganini tushuntirdi: "Men hozir Samarqanddaman. Ilgari bu 12 sotix yerga o‘zim uchun uy qurib, oilam bilan yashashni niyat qilgandim.
Lekin hayot rejalarga har doim ham mos kelavermaydi. Opalarimdan birining uysizligi sabab, bu yerga noldan uy qurib, uni barcha qulayliklari bilan opamga taqdim etmoqchiman.
Uyda mebel va texnika to‘liq joylashtiriladi, hali ba’zi ishlar qolgan, ularni ham 15-20 kun ichida tugatib topshiraman. Bu gaplarni aytishimdan maqsad maqtanish emas.
Agar bunday ehtiyoj bo‘lmaganida, yanada xursand bo‘lardim. Hayotda ertaga nima bo‘lishini hech kim bilmaydi.
Shuni ta’kidlashni istardimki, hayotda faqat yer yoki mol-dunyo talashib, bir-biriga dushman bo‘lib qolgan opa-singillar yoki aka-ukalar emas, balki bir-birini jonidan ortiq ko‘radigan yaqinlar ham bor. Men ham qimmat mashinalar olib, hashamatli uylar qursam bo‘lardi, lekin jigarchilikni tanladim.
Bu orqali shuni aytmoqchimanki, mening ikki opam va bir akam bor. Ularni juda yaxshi ko‘raman va ular uchun qo‘limdan kelgan barcha narsani qilishga tayyorman.
Ularning sog‘-omon bo‘lishi men uchun eng katta baxt. Hayotda pul ham, obro‘ ham topiladi, lekin jigarlar, yaqinlar topilmaydi", — deydi aktyor.
