Aktrisa Nargiza Abdullayeva yaqinda NavoTV telekanalida efirga uzatiladigan “13 studiya” ko‘rsatuvida mehmon bo‘lib, farzandlari va ularning tarbiyasi haqida ochiqchasiga o‘z fikrlarini bildirdi. Bu haqda Zamin.uz xabar berdi.
Suhbat davomida u farzandlari bilan bog‘liq hayotiy tajribalarini o‘rtoqlashdi. Ko‘rsatuvda aktrisadan o‘g‘lining bir fikri haqida so‘raldi: “O‘g‘il bola erkak bo‘lib tug‘iladi, lekin hamma ham erkaklik mas’uliyatini his qilavermaydi.
Bu fikr sizga qanday ta’sir qildi va unga qanchalik qo‘shilasiz?” Nargiza Abdullayeva bu savolga katta samimiyat bilan javob qaytarar ekan, o‘g‘lining ushbu so‘zlarini o‘zi uchun juda ahamiyatli deb hisoblashini ta’kidladi. U o‘g‘lining kamgap, ammo chuqur o‘yli ekanini aytib o‘tdi.
“Bu gapni ovqatlanayotganimizda aytgan edi. Hatto menga: ‘Oyi, intervyuga borsangiz, mening shu fikrimni aytib qo‘ying,’ degan.
Men uning kelajakda munosib inson bo‘lishiga ishonaman,” dedi aktrisa. Shuningdek, Nargiza Abdullayeva farzandlarining 16 yoshga kirgani va hayotning yaxshi-yomon tomonlarini ajratishni o‘rganayotganidan mamnun ekanini bildirdi.
“San’atkorning farzandi bo‘lish oson emas, lekin bolalarim yo‘ldan adashmasdan ulg‘ayayotganidan xursandman,” deya qo‘shimcha qildi u. Aktrisa farzandlarining yana bir qiziqarli iltimosini ham oshkor qildi.
Ularning fikricha, onasining mashhurligi ularga noqulaylik tug‘dirishi mumkin. “Bolalarim doim menga: ‘Oyi, iltimos, hech kimga siz bizning onamiz ekaningizni aytmang.
Odamlar bizni o‘zimizdek qabul qilishsin,’ deyishadi. Bu so‘zlarni eshitib, ularning mustaqil va adolatli bo‘lishga intilayotganidan faxrlanaman,” dedi Nargiza Abdullayeva.
