Shahlo Norova "Milliy iftixor" mukofotiga sazovor bo‘ldi

22-dekabr kuni Mustaqil Davlatlar Hamdo‘stligi (MDH) doirasida tashkil etilgan xalqaro ilmiy-amaliy ko‘rik-tanlovning 18 turi o‘tkazildi. Bu haqda Zamin.uz xabar berdi.

Ushbu nufuzli tadbirda aktrisa, boshlovchi va xonanda Shahlo Norova “Milliy iftixor” nominatsiyasi bo‘yicha mukofotga sazovor bo‘ldi. Mazkur mukofot vatanparvarlik, sadoqat, jasorat va fidoyilik kabi yuksak fazilatlarni targ‘ib etish, shuningdek, yosh avlodni milliy g‘urur va ma’naviy qadriyatlar ruhida tarbiyalashga hissa qo‘shgan shaxslarga topshiriladi.

Tashkilotchilar Shahlo Norovaning ijodiy va jamoatchilik faoliyatini aynan shu mezonlarga mos, deb e’tirof etishdi. Mukofot tantanasi yakunlanganidan so‘ng, Shahlo Norova o‘zining Instagram sahifasida ushbu yutuq haqida post e’lon qilib, o‘z his-tuyg‘ulari bilan bo‘lishdi.

U postida quyidagicha fikr bildirdi: “To‘xtamasdan harakat qilgan inson albatta natija ko‘radi. Bugun mukofot, ertaga yanada katta maqsadlar sari…” Muxlislar va hamkasblar Shahloxonimni ushbu yuksak e’tirof bilan samimiy tabriklashdi.

Ular bu mukofotni uning mehnatiga berilgan munosib baho sifatida qabul qilishdi va unga yangi ijodiy yutuqlar tilashdi.