“Hayvonlar shahri–3” ustida ishlar boshlandi
“Hayvonlar shahri–3” animatsion filmi ustida ishlar boshlandi. Bu haqda Zamin.uz xabar berdi.
Bu haqda “Hayvonlar shahri–2” multfilmini suratga olgan rejissyorlar Bayron Hovard va Jared Bush Xitoyning Weibo ijtimoiy tarmog‘ida muxlislar bilan o‘tkazilgan jonli muloqotda ma’lum qilishdi. Ular yangi qism ustidagi ishlar allaqachon boshlanganini ochiq aytib o‘tishdi.
Rejissyorlarning so‘zlariga ko‘ra, uchinchi qismning chiqishi ikkinchi film kabi to‘qqiz yil kechiktirilmaydi. Bayron Hovard bu borada shunday dedi: “Keyingi filmni ekranlarga chiqarish uchun bu qadar uzoq kutishni rejalashtirmayapmiz.
U ancha tezroq tayyor bo‘ladi, deb umid qilamiz.” Ushbu so‘zlar muxlislar orasida katta qiziqish va umid uyg‘otdi. Jared Bush esa hozirda jamoa turli syujet yo‘nalishlari ustida faol ishlayotganini aytib o‘tdi.
Uning ta’kidlashicha, syujetni shakllantirish odatda 2–3 yil vaqt olsa, to‘liq filmni yaratish jarayoni 4–5 yil davom etadi. Agar barcha rejalar o‘z vaqtida amalga oshsa, “Hayvonlar shahri–3” taxminan 2030-yilda namoyish etilishi mumkin.
Shuningdek, rejissyorlar yangi qismda qushlar paydo bo‘lishi ehtimolini ham istisno qilishmadi. Ularning fikricha, ikkinchi qism finalida ko‘zga tashlangan pat aynan shu g‘oyaga ishora qilishi mumkin.
Mushuk va itlarning nega bu olamda yo‘qligi haqidagi savollarga javob berar ekan, ular “Hayvonlar shahri”da odamlar kabi uy hayvonlari mavjud emasligini tushuntirishdi. Bundan tashqari, ayrim qahramonlarga bag‘ishlangan alohida loyihalar va eskizlar yaratilishi rejalashtirilayotganini ham ma’lum qilishdi.
Xususan, muxlislarning sevimlisi bo‘lgan yalqov Blits haqida alohida loyiha yaratish g‘oyasi ham mavjud. Rejissyorlar “Hayvonlar shahri” olamini faqat to‘liq metrajli filmlar bilan chegaralab bo‘lmasligini, uning imkoniyatlari keng ekanini ta’kidlashdi.
