Makoley Kalkin: Mashhurlikdan oddiy hayotga yo‘l
Makoley Kalkin 1990-yillarning boshida “Uyda yolg‘iz” va uning davomiy filmlari orqali dunyoga mashhur bo‘lgan. Bu haqda Zamin.uz xabar berdi.
Biroq, aktyor keyinchalik kinodan butunlay uzoqlashishga qaror qildi. Hozirda 45 yoshda bo‘lgan Kalkinning aytishicha, u bolaligida shon-shuhratdan ko‘ra oddiy hayotni, do‘stlari bilan vaqt o‘tkazishni va erkin bolalikni tanlagan.
Kalkin Mythical Kitchen podkastida bolalikda suratga olish jarayonlari ko‘pchilik tasavvur qilganidek jamoaviy emasligini ta’kidladi. U aksar hollarda yolg‘iz ishlaganini va syomka vaqtida o‘zini doim yakkalangan his qilganini aytadi.
Hatto “Uyda yolg‘iz” filmini qayta tomosha qilganda, o‘zini kimsasiz orolda bo‘lgandek his qilganini hazilomuz tarzda eslatib o‘tgan. 1994-yilda suratga olingan “Boyvachcha Rich” filmining muvaffaqiyatidan so‘ng, Kalkin Gollivudni tark etishga qaror qiladi.
O‘sha davrda dunyodagi eng taniqli bola aktyorlardan biri bo‘lganiga qaramay, u oddiy hayotni, bolalikka xos tajribalarni va do‘stlar bilan uchrashuvlarni ko‘proq qadrlaganini aytadi. “O‘sha narsalarni o‘tkazib yuborganimni keyinroq angladim”, deydi aktyor.
Kalkin mashhurlikni “tish pastasini qayta idishga solib bo‘lmaydigan jarayon”ga o‘xshatadi. U hech qachon taniqli bo‘lishni maqsad qilmaganini va aktyorlik faoliyatiga tasodifan kirib kelganini qayd etadi.
Shu bilan birga, Kevin Makkalister obraziga qaytish imkoniyati haqida ham gapirib, yaxshi ssenariy bo‘lsa, bu taklifni qabul qilishi mumkinligini bildirgan. Hatto ehtimoliy davom filmida voyaga yetgan Kevin otalik muammolari bilan kurashishini tasavvur qilgan.
Bugungi kunda Makoley Kalkin o‘z e’tiborini oilasiga qaratgan. U aktrisa Brenda Song bilan ikki nafar o‘g‘ilni tarbiyalayotgan bo‘lib, kameralardan yiroq, xotirjam hayot kechirishni afzal ko‘radi.
