Hande Erchelning sog‘lig‘i haqida xavotirlar kuchaydi
Turkiyaning mashhur aktrisasi Hande Erchel so‘nggi paytlarda muxlislar orasida yana e’tibor markazida qoldi. Bu haqda Zamin.uz xabar berdi.
Aktrisa yaqinda Vogue jurnali uchun o‘tkazilgan fotosessiyada ishtirok etdi va o‘sha suratlarni ijtimoiy tarmoqdagi sahifasida joylashtirdi. Biroq muxlislarning asosiy diqqat-e’tibori bu gal uning tashqi ko‘rinishiga qaratildi.
Ko‘pchilik Hande Erchelning juda ozib ketgani, rangi oqarib, xasta ko‘rinayotgani haqida xavotirli fikrlar bildirdi. Ijtimoiy tarmoq foydalanuvchilari orasida turli munosabatlar paydo bo‘ldi.
Ayrimlar aktrisaning sog‘lig‘i haqida tashvish bildirishib, u shifokor ko‘rigidan o‘tishi kerakligini ta’kidlashdi. Ba’zilari esa uning bu holatini anoreksiya bilan bog‘lashga urinishdi.
“Bu suratlarda Hande o‘ziga umuman o‘xshamaydi”, degan izohlar ham uchradi. Shunga qaramay, Hande Erchel bu borada hech qanday izoh bermadi va muxlislarining xavotiriga javob qaytarmadi.
Aktrisaning sog‘lig‘i haqida turli shubhalar tug‘ilgan bo‘lsa-da, uning opasi Gamze Erchel bu xabarlarni rad etdi. U yaqinda bergan intervyusida Hande o‘zini yaxshi his qilayotganini, ular yaqinda birga ta’til o‘tkazganlarini va oila davrasida vaqtni maroqli o‘tkazganlarini aytdi.
Ma’lumot uchun, Hande Erchel 1993 yil 24 noyabrda Turkiyaning Balikesir viloyati, Bandirma shahrida tug‘ilgan. U oilada ikki farzandning kichigi bo‘lib, opasi Gamze Erchel ham aktrisa va model sifatida tanilgan.
Hande o‘z faoliyati davomida “Qalbim eshigini qoq”, “Halqa”, “Azize” kabi seriallarda ishtirok etib, katta shuhrat qozongan. So‘nggi yillarda esa u moda olami va ijtimoiy tarmoqlarda ham katta auditoriyaga ega bo‘lgan.
