Saida Mirziyoyeva: “Men, avvalo, xizmatchiman”
Saida Mirziyoyeva Prezident Administratsiyasi rahbari sifatida jurnalist va bloger Kirill Altmanga katta intervyu berdi. Bu haqda Zamin.uz xabar berdi.
Suhbat davomida u o‘zining kasbiy faoliyati, Prezident bilan ishlash tajribasi va shaxsiy qarashlari haqida ochiq fikr bildirdi. Jurnalistning “Siz aslida kimsiz, Saida Shavkatovna?” degan savoliga u qisqa va aniq javob berdi: — Men xizmatchiman.
Men, birinchi navbatda, otamga xizmat qilaman, chunki u mening hayotimdagi eng ulug‘ inson. Intervyuda Saida Mirziyoyeva 9 yildan beri Prezident Administratsiyasida ishlab kelayotganini ta’kidladi.
U shaxsiy hayotining deyarli yo‘qligini, faoliyatini aynan shu tizimda boshlab, shu yerda yakunlashni rejalashtirayotganini aytdi. Uning so‘zlariga ko‘ra, ish uning hayotining asosiy qismiga aylangan.
Suhbat davomida Prezidentning boshqaruv uslubi haqida ham so‘z bordi. “Prezident qattiqqo‘l insonmi?” degan savolga u quyidagicha javob berdi: — Oxirgi 9 yil ichida amalga oshirilgan islohotlarga qarang.
Bunday natijalarga faqat qattiqqo‘llik bilan erishib bo‘lmaydi. Buning uchun moslashuvchanlik va donolik kerak, deb o‘ylayman.
Saida Mirziyoyevaning fikricha, Shavkat Mirziyoyev olib borayotgan islohotlar muloqot, tushunish va muvozanatli qarorlar asosida amalga oshirilmoqda. Mazkur intervyu ijtimoiy tarmoqlarda katta qiziqish uyg‘otdi.
Ko‘plab foydalanuvchilar suhbatni samimiy va ochiq deb baholamoqda.
