“Zveropolis 2” Disney tarixidagi eng daromadli film bo‘ldi
Disney kompaniyasining “Zveropolis 2” animatsion filmi kinoteatrlarda katta muvaffaqiyatga erishmoqda. Bu haqda Zamin.uz xabar berdi.
Film global miqyosda 1,588 milliard dollar daromad to‘plab, 1,6 milliard dollarlik marraga yaqinlashdi. Ushbu natija uni Disney tarixidagi eng ko‘p daromad keltirgan animatsion filmga aylantirdi.
“Zveropolis 2” ayniqsa Xitoy bozorida katta muvaffaqiyatga erishdi. Bu mamlakatda film 600 million dollardan ortiq daromad keltirdi va Xitoyda eng muvaffaqiyatli gollivud kinoloyihasiga aylandi.
Xitoyda unga raqobatdosh bo‘la olgan yagona film “Avatar: Olov va kul” bo‘lib, u ham 100 million dollardan ortiq daromad keltirgan. Shuningdek, “Zveropolis 2” PG reytingiga ega filmlar orasida 1 milliard dollarlik daromad marrasiga eng tez yetgan film sifatida tarixga kirdi.
U bu natijaga premyeradan atigi 17 kun o‘tib erishgan. Mazkur film 2025 yilga kelib, 1 milliard dollardan ortiq daromad to‘plagan uchta film qatoriga kirdi.
Ushbu ro‘yxatda “Lilo va Stich” remeyki (1,03 milliard dollar) va 2,2 milliard dollar daromad bilan yetakchilik qilayotgan xitoy filmi “Nechja” ham bor.
