“Zveropolis 2” Disney tarixida rekord o‘rnatdi
Disney studiyasi tomonidan suratga olingan “Zveropolis 2” animatsion filmi kinoteatrlarda katta muvaffaqiyatga erishib, millionlab daromad yig‘ishda davom etmoqda. Bu haqda Zamin.uz xabar berdi.
Filmning umumjahon kassa daromadi 1,588 milliard AQSh dollariga yetdi va yaqin kunlarda bu ko‘rsatkich 1,6 milliard dollardan oshishi kutilmoqda. Bu natija bilan “Zveropolis 2” Disney tarixidagi eng ko‘p daromad keltirgan animatsion loyiha sifatida qayd etildi.
Film ayniqsa Xitoy bozorida katta muvaffaqiyatga erishdi. Xitoyda ushbu kartina 600 million dollardan ortiq daromad yig‘ib, mamlakatdagi eng muvaffaqiyatli Gollivud loyihasiga aylandi.
Hozircha unga raqobat qilishi mumkin bo‘lgan yagona film “Avatar: Alanga va kul” bo‘lib, u Xitoyda 100 million dollardan ziyod daromad to‘play olgan. Shuningdek, “Zveropolis 2” PG reytingiga ega filmlar orasida 1 milliard dollarlik daromad chegarasini eng tez bosib o‘tgan loyiha bo‘ldi.
Ushbu natijaga film premyerasidan atigi 17 kun ichida erishildi. 2025 yilda “Zveropolis 2” jahon prokatida 1 milliard dollardan oshgan uchta film qatoriga kirdi.
Bu ro‘yxatda “Lilo va Stich” remeyki (1,03 milliard dollar) hamda yilning jahon bozoridagi yetakchisi bo‘lgan xitoy filmi “Nechja” (2,2 milliard dollar) ham bor.
