Ronaldu faoliyatini tugatgach, hashamatli qasrga ko‘chadi
Portugaliya terma jamoasi sardori Krishtianu Ronaldu futbolchilik faoliyatini yakunlagach, o‘z vatanida joylashgan, qiymati 30 million funt sterlingga teng hashamatli qasrga ko‘chib o‘tishni rejalashtirmoqda. Bu haqda Zamin.uz xabar berdi.
Bu haqda “Daily Express” nashri xabar berdi. Mazkur qasr Portugaliyaning Lissabon shahridan 48 kilometr uzoqlikda, qirg‘oqbo‘yi hududda qurilgan bo‘lib, mamlakatdagi eng katta va eng qimmat uylar qatoridan joy olgan.
Sakkizta yotoqxona va boshqa zamonaviy sharoitlarga ega bo‘lgan bu qasrning qurilishi uch yil davom etgan. Ma’lum qilinishicha, Ronaldu futbolchilik faoliyatini tugatgach, aynan shu uyga ko‘chib o‘tishi kutilmoqda.
Qasrning eng qiziqarli jihatlaridan biri — yerosti avtoturargohi. Bu joy Ronalduning 13,8 million yevro qiymatidagi avtomobillar kolleksiyasini saqlash uchun maxsus moslashtirilgan.
Uy nafaqat yashash uchun, balki futbolchining qimmatbaho avtoparki uchun ham qulayliklarga ega. Hashamatli qasrda shisha basseyn, suv osti yo‘lagi, aqlli isitish tizimi, sport zali, yopiq va ochiq basseynlar, massaj xonasi, shaxsiy kinoteatr kabi zamonaviy qulayliklar mavjud.
Mehmonlar suv ostidan yuqorida suzayotganlarni kuzatish imkoniyatiga ega bo‘lishadi. Qasrning ichki bezaklari ham alohida e’tiborga loyiq.
Uyning ayrim qismlarida sof oltindan yasalgan jo‘mraklar, italyan marmarlari va maxsus Louis Vuitton devoriy rasmlari ishlatilgan. Ronaldu bu qasr yaqinida golf maydonchasi sotib olishga harakat qilgan, ammo uning taklifi rad etilgan.
