Beyonse milliarderlar ro‘yxatida beshinchi o‘ringa chiqdi
Amerikalik mashhur xonanda va prodyuser Beyonsening umumiy boyligi 1 milliard dollarga yetdi. Bu haqda Zamin.uz xabar berdi.
U nafaqat musiqa sohasida, balki biznes loyihalari orqali ham katta moliyaviy muvaffaqiyatga erishib, dunyoning eng boy san’atkorlari qatoridan joy oldi. “Forbes” nashri ma’lumotlariga ko‘ra, Beyonsening ko‘chmas mulk aktivlari va investitsiyalari uning moliyaviy holatini mustahkamlashda katta ahamiyat kasb etgan.
U hozirda dunyodagi musiqiy milliarderlar ro‘yxatida beshinchi o‘rinni egallaydi. Ro‘yxatda undan yuqori o‘rinlarda Jay-Z, Teylor Svift, Rianna va Bryus Springstin kabi mashhurlar joylashgan bo‘lib, ularning boyligi 1,1 milliarddan 2,5 milliard dollargacha baholanmoqda.
Mutaxassislarning fikricha, Beyonsening bu darajaga yetishida ijodi va shaxsiy brendlari katta rol o‘ynagan. 2023 yilda o‘tkazilgan “The Renaissance” konsert turnesi uning moliyaviy o‘sishida muhim ahamiyat kasb etgan.
Ushbu gastrollar qariyb 600 million dollar daromad keltirib, xonandaning eng muvaffaqiyatli turnesi sifatida qayd etilgan. Shuningdek, Cowboy Carter albomi doirasida tashkil etilgan konsertlar ham yuqori daromad ko‘rsatgan.
Beyonsening daromadlari faqat musiqadan iborat emas. 2024 yilda ishga tushirilgan Cecred soch parvarishi brendi qisqa vaqt ichida bozorda muvaffaqiyatga erishgan.
Bundan tashqari, Beyonse premium segmentdagi viski brendiga ham egalik qiladi. Shu bilan birga, u ilgari Ivy Park kiyim-kechak brendini boshqargan, biroq 2024 yilda ushbu brend faoliyatini to‘xtatgan.
