Aktrisa Aysanem Yusupova 29 yoshga to‘ldi
Aktrisa Aysanem Yusupova 2-yanvar kuni 29 yoshga to‘lganini nishonladi. Bu haqda Zamin.uz xabar berdi.
U kliplardagi rollari va “O‘zbek qizi” filmi orqali keng ommaga tanilgan bo‘lib, asli Qoraqalpog‘istondan chiqib, san’at sohasida o‘z o‘rnini topgan. Aysanemning so‘zlariga ko‘ra, san’atga qiziqishi avval qo‘shiqchilik orqali boshlangan.
Bu yo‘lda uning onasi katta turtki bergan, orzusi va qo‘llab-quvvatlashi bilan uni san’atga yetaklagan. Keyinchalik Aysanem Toshkentga kelib, san’at oliygohiga hujjat topshirgan va ikkinchi urinishda muvaffaqiyatli imtihonlardan o‘tib, aktrisalik yo‘lini tanlagan.
Uning kinodagi faoliyatida ustoz Jo‘ra Mahmudovning hissasi katta bo‘lgan. Mahmudov birinchi kursdayoq uni kastinglarda qo‘llab-quvvatlab, yo‘l-yo‘riq ko‘rsatgan.
Aysanemning ilk yirik loyihalaridan biri rejissyor Hilol Nasimovning “Hayot” filmi bo‘lgan. Aktrisa o‘zining eng katta sinovlaridan biri sifatida “O‘zbek qizi” filmini alohida ta’kidlaydi.
Ushbu filmda ishlash jarayoni jismoniy va ruhiy jihatdan og‘ir kechgan. Tayyorlanish, ko‘p dubllar va hatto jarohatlar ham bo‘lgan.
Shunga qaramay, bu loyiha uning ijodida muhim bosqich bo‘lib, san’atda yangi marralarga erishishiga zamin yaratgan. Aysanemning aytishicha, u aktrisalik faoliyatidan asosiy maqsadi sifatida xalqqa foydali, esda qoladigan va mazmunli ijodiy ishlar qoldirishni ko‘zlaydi.
