Saida Rametova ayollarning erta qarish sabablari haqida gapirdi

Aktrisa Saida Rametova ayollarning erta qarishiga sabab bo‘ladigan omillar haqida o‘z fikrlarini ijtimoiy tarmoqlarda izhor etdi. Bu haqda Zamin.uz xabar berdi.

Uning so‘zlariga ko‘ra, ayollarning qarishiga asosan tuhmat, nohaqlik, moddiy yetishmovchilik va g‘am-anduhlar sabab bo‘ladi. Saida Rametova quyidagicha fikr bildirdi: "Tuhmat insonni tez qaritadi, nohaqlik esa qalbga og‘ir tushadi va organizmga ta’sir qiladi.

Moddiy yetishmovchilik va orzularning amalga oshmasligi ham ayol kishining ruhiy holatiga salbiy ta’sir qiladi. Agar ayol hayotda o‘zi istagan turmush tarzini yaratolmasa yoki hayotdagi qiyinchiliklar uni qiynab qo‘ysa, bu holatlar ayolni tez qaritadi, deb o‘ylayman." Shuningdek, aktrisa ayollarga baxtli va sog‘lom hayot tilab, shunday dedi: "Xohlayman, ayollarimiz hech qachon bevaqt qarimasin, sochlariga erta oq tushmasin, qalblari og‘rimasin.

Ularning qalbi mehrga to‘la, hayoti esa oila a’zolari, sevimli kasbi va turmush o‘rtog‘i bilan farovon bo‘lsin. Turmush o‘rtog‘i yonida bo‘lgan ayol o‘zini yanada baxtiyor his qiladi." Saida Rametova ushbu so‘zlarni aytayotganida ko‘z yoshlarini yashira olmadi.

U o‘z tilaklari orqali ayollarning baxtli, sog‘lom va tinch hayot kechirishini chin dildan istashini bildirdi.