“Oltin globus” g‘oliblari e’lon qilindi: asosiy natijalar
Los-Anjeles shahrida “Oltin globus” mukofotining 83-marosimi bo‘lib o‘tdi. Bu haqda Zamin.uz xabar berdi.
Unda Pol Tomas Anderson tomonidan suratga olingan “Jang ortidan jang” filmi kechaning eng yirik g‘olibi bo‘ldi. Ushbu tragikomediya “Eng yaxshi komediya yoki myuzikl”, “Eng yaxshi rejissura”, “Eng yaxshi ssenariy” va “Ikkinchi plandagi eng yaxshi ayol roli” nominatsiyalarida sovrinlarga sazovor bo‘ldi.
Ikkinchi plandagi eng yaxshi ayol roli uchun mukofot Tiyana Teylorga topshirildi. “Eng yaxshi drama” nominatsiyasida esa Xloi Chjao rejissyorligidagi “Gamnet” filmi g‘olib bo‘ldi.
Ushbu film Meggi O’Farrell romaniga asoslanib suratga olingan bo‘lib, Uilyam Shekspirning yoshlik davriga bag‘ishlangan. Filmning bosh qahramoni Jessi Bakli dramatik filmda “Eng yaxshi ayol roli” uchun “Oltin globus” mukofotini qo‘lga kiritdi.
Xorijiy filmlar orasida braziliyalik rejissyor Kleber Mendonsa Filyo tomonidan suratga olingan “Maxfiy agent” trilleri “Eng yaxshi xorijiy film” deb topildi. Ushbu filmda bosh rolni ijro etgan Vagner Moura esa drama janrida “Eng yaxshi erkak roli” uchun mukofotga loyiq ko‘rildi.
Komediya yoki myuzikl janridagi “Eng yaxshi erkak roli” Timoti Shalamega nasib etdi. U “Marti Ajoyib” filmidagi ijrosi bilan ilk bor “Oltin globus” mukofotini qo‘lga kiritdi.
Eng yaxshi dramatik serial “Pitt shifoxonasi” deya e’tirof etildi. Ushbu serialda o‘ynagan Noa Uayli “Eng yaxshi erkak roli” uchun taqdirlandi.
Komediyaviy seriallar orasida esa “Kinostudiya” eng yaxshisi deb topildi. Rouz Birn komediya yoki myuzikl yo‘nalishida “Eng yaxshi aktrisa” sovrinini qo‘lga kiritdi.
Jin Smart esa “Hiylalar” serialidagi roli uchun alohida mukofot oldi. Mini-seriallar toifasida “O‘tish yoshi” eng yaxshi deb topildi.
Ikkinchi plandagi eng yaxshi erkak roli uchun 16 yoshli Ouen Kuper g‘olib chiqib, ushbu yo‘nalishda eng yosh laureatga aylandi. Mini-serialdagi eng yaxshi aktyorlik uchun Stiven Grem va Erin Doerti ham mukofotlarga loyiq topildi.
