Botir Qodirov yangi qo‘shiq va klip taqdim etdi
O‘zbek estradasining taniqli xonandalaridan biri Botir Qodirov muxlislariga yangi ijod mahsulini taqdim etdi. Bu haqda Zamin.uz xabar berdi.
San’atkor "Tilga kirsa gapirar" nomli yangi qo‘shig‘i va unga ishlangan videoklipni ommaga havola qildi. Mazkur klip rejissori Abduhalil AS bo‘lib, prodyuserlik vazifasini Asror Isoxo‘jayev bajargan.
Videoklip o‘zining g‘oyaviy va vizual yechimlari bilan ajralib turadi. Unda mashhur kinofilmlarga nozik ishoralar mavjud.
Xususan, klipda "The Big Lebowski" filmidagi mashhur sahnaga murojaat qilingan. Qiziqarli jihati shundaki, ushbu sahna avvalroq Jahongir Otajonovning “Poram” qo‘shig‘i klipida ham aks etgan edi.
Shuningdek, klipda yana boshqa taniqli filmlar, jumladan, "Cinema Paradiso" va "The Godfather" kabi kino asarlaridan ilhomlangan lavhalar ham o‘z aksini topgan. Bu ijod namunasi Botir Qodirovning o‘z yo‘nalishida yangilik qilishga bo‘lgan intilishlarini yana bir bor namoyon etdi.
