BTS 2026-yilda global konsert turini boshlaydi
K-pop musiqasi olamining eng mashhur guruhlaridan biri BTS uzoq tanaffusdan so‘ng katta qaytishni e’lon qildi. Bu haqda Zamin.uz xabar berdi.
BigHit Music tomonidan taqdim etilgan ma’lumotlarga ko‘ra, guruh 2026–2027-yillarda dunyo bo‘ylab ulkan konsert turini tashkil qiladi. Ushbu safar 2026-yil aprel oyida Janubiy Koreyada boshlanib, 2027-yil mart oyigacha davom etadi.
Dastur doirasida jami 70 dan ortiq shou o‘tkazilishi rejalashtirilgan. Konsertlarning asosiy yangiliklaridan biri — 360 darajali sahna formati qo‘llanilishi.
Bu format tomoshabinlar uchun qulaylik yaratib, arenada ko‘rish burchagini yanada yaxshilash imkonini beradi. Bundan tashqari, BTS yangi albomini chiqarishini ham rasman e’lon qildi.
Ma’lumotlarga ko‘ra, yangi albom 2026-yil 20-mart kuni taqdim etiladi. Ushbu albom yozuvlari Los-Anjelesda amalga oshirilgani xabar qilingan.
Chiptalar sotuviga kelsak, ARMY Membership a’zolari uchun oldindan sotuv 2026-yil 22–23-yanvarda Weverse platformasi orqali boshlanadi. Umumiy sotuv esa 24-yanvar kuni ochiladi.
Konsertlarning ayrim shaharlariga kelsak, ular orasida Goyang, Tokio, Mexiko shahri, London, Parij, Los-Anjeles, Toronto, Bogota, San-Paulu, Bangkok va Sidney kabi yirik markazlar bor. ARMYlar uchun endi asosiy savol “qachon?” emas, balki “qaysi shaharga chipta olamiz?” bo‘lib qolmoqda.
Shu bois, chiptalar savdosi kuni internetingiz barqaror ishlashiga e’tibor qaratishingizni tavsiya qilamiz.
