“Zveropolis 2” Disney tarixidagi eng daromadli film bo‘ldi

Disney tomonidan ishlangan “Zveropolis 2” multfilmi jahon kinoprokatida 1,7 milliard dollar daromad yig‘ib, Gollivud tarixidagi eng muvaffaqiyatli animatsion kartinaga aylandi. Bu haqda Zamin.uz xabar berdi.

Ushbu summa orqali “Zveropolis 2” avvalgi rekordchi - “Boshqotirma 2”ni (1,69 milliard dollar) ortda qoldirdi. Shunga qaramay, dunyo miqyosidagi mutlaq rekord Xitoyning “Nechja 2” multfilmiga tegishli bo‘lib, u 2,25 milliard dollar daromad bilan yetakchilikni saqlab qolmoqda.

Bu haqda Variety nashri xabar berdi. “Zveropolis 2” ana shunday daromad bilan barcha davrlarning eng ko‘p daromad keltirgan filmlari ro‘yxatida to‘qqizinchi o‘ringa ko‘tarildi.

Ushbu multfilm noyabr oyida ekranlarga chiqqanidan so‘ng dastlabki besh kun ichida 559,5 million dollar yig‘ib, animatsion filmlar tarixidagi eng muvaffaqiyatli startni amalga oshirdi. Umuman olganda, Shimoliy Amerikada film 390 million dollar daromad qilgan bo‘lsa, xalqaro miqyosda 1,31 milliard dollar yig‘ishga muvaffaq bo‘ldi.

Ayniqsa, Xitoyda film juda iliq kutib olingan bo‘lib, u yerda 619 million dollar daromad ko‘rsatkichiga erishdi. Shuningdek, “Zveropolis 2” Disney tarixidagi eng daromadli film sifatida ham qayd etildi.

Filmda quyon Judi Xopps va tulki Nik Uayld yana birgalikda ishlashadi. Ular Zveropolis shahridagi hayotni butunlay o‘zgartirishi mumkin bo‘lgan sudralib yuruvchilar bilan bog‘liq sirni fosh qilishga harakat qilishadi.

Filmning Xitoydagi muvaffaqiyati yoshlar orasida sudralib yuruvchilarga bo‘lgan qiziqishni oshirdi. Film qahramonlaridan biri bo‘lgan Gari ilonidan ilhomlangan tomoshabinlar sudralib yuruvchilarni sotib olishga qiziqishni boshlaganliklari ham kuzatilmoqda.