Feruza Jumaniyazova: "Onamning quchog‘iga qaytishni istardim"
Xonanda Feruza Jumaniyazova yaqinda “IntervyuTV” kanali bilan bo‘lgan suhbatida o‘zining samimiy va ta’sirli fikrlari bilan o‘rtoqlashdi. Bu haqda Zamin.uz xabar berdi.
Undan: “Agar vaqtni orqaga qaytarish imkoni bo‘lsa, qaysi davrga qaytgan bo‘lardingiz va nimalarni o‘zgartirgan bo‘lardingiz?” deb so‘rashdi. Feruza ushbu savolga biroz mayus ohangda javob berdi: “Men onamning quchog‘iga qaytishni istar edim.
Onamni juda sog‘indim. Agar o‘sha kichik bir xonali uyimizda yashash imkoniyati bo‘lsa, ota-onamning yonida bo‘lishga rozi edim.
Hatto Feruza Jumaniyazova bo‘lmasam ham, qotgan non yesam ham, faqat ular bilan birga bo‘lishni orzu qilardim. Qaniydi, shunday imkoniyat bo‘lsa...” Bu so‘zlarni aytar ekan, xonanda ko‘zlariga yosh oldi.
Uning bu samimiy so‘zlari ko‘plab tinglovchilarni chuqur o‘yga soldi. Xonandaning javobi ota-onaning qadriga yetishga, ularni asrab-avaylashga undaydi.
Ota-onasidan ayrilganlar esa bu so‘zlarni eshitib, ularning xotiralarini yana bir bor yodga olishdi. Shu sababdan xulosa qilish mumkinki, ota-onaning hayotda yonimizda bo‘lishi va ularning mehrini his qilish — inson uchun eng katta baxtdir.
Bu ne’matning qadriga yetish esa barchamiz uchun muhimdir.
