Taniqli jurnalist Abdusamad Yo‘ldoshev vafot etdi

Taniqli jurnalist va mehnat faxriysi Abdusamad Yo‘ldoshev 86 yoshida vafot etdi. Bu haqda Zamin.uz xabar berdi.

U uzoq yillar davomida ommaviy axborot vositalari sohasida fidokorona mehnat qilib, jurnalistika rivojiga munosib hissa qo‘shgan ijodkorlardan biri sifatida tanilgan. Abdusamad Yo‘ldoshev 1940 yilda Toshkent viloyatining Zangiota tumani, Xonobod qishlog‘ida tug‘ilgan.

U o‘z mehnat faoliyati davomida O‘zbekiston radiosi, “Xalq so‘zi” va “Toshkent haqiqati” kabi nufuzli ommaviy axborot vositalarida ishlagan. Jurnalist sifatida u muxbirlikdan boshlab, bo‘lim boshlig‘i hamda bosh muharrirning birinchi o‘rinbosari kabi mas’uliyatli lavozimlarda xizmat qilgan.

Uning mehnatlari davlat tomonidan munosib e’tirof etilib, “O‘zbekiston Respublikasida xizmat ko‘rsatgan jurnalist” faxriy unvoni bilan taqdirlangan. Abdusamad Yo‘ldoshevning vafoti jurnalistika sohasida katta yo‘qotish bo‘ldi.

Uning xotirasi qalblarda mangu saqlanadi. Yaratgandan marhumning oxiratini yorug‘ qilishini so‘raymiz.