Vazira Yunusova: "Birovning qizini yomonlamang"
Aktrisa Vazira Yunusova ayollarga murojaat qilib, birovning qizini yomonlamaslikka chaqirgan. Bu haqda Zamin.uz xabar berdi.
Uning fikriga ko‘ra, kelin bo‘lib keladigan qiz haqida gap ketganda, asossiz yomonlash yoki bilmagan narsaga aralashish noto‘g‘ri. "Ayollardan iltimos qilgan bo‘lardim: birovning qizini yomonlamang", deydi aktrisa.
Vazira Yunusovaning ta’kidlashicha, agar kimdir bir oiladan yoki qizdan so‘rasa va u haqida ma’lumotga ega bo‘lmasa, "bilmayman" deb javob berish madaniyatga mos bo‘ladi. Agar yaxshi bilsa, aksincha, yaxshi gapirib, maqtash kerakligini eslatadi.
U bunday gap-so‘zlarning oqibati oila va farzandlar tarbiyasiga salbiy ta’sir ko‘rsatishini aytib, "Nega yomonlaysiz, bu sizning nevaralaringizdan qaytadi", degan fikrni bildiradi. Aktrisaning so‘zlariga ko‘ra, har bir nikoh va taqdirda bir hikmat bor.
"Nima bo‘lganda ham, bu juftlik Alloh irodasi bilan birlashmoqda. Yomonlikka erishib nima qilasiz?" deya u ayollarni mehr-muruvvatli, insofli bo‘lishga chaqirgan.
