Ronaldu sog‘liq va farovonlik sohasiga sarmoya kiritdi
Dunyo futbolida eng ko‘p gol urgan Krishtianu Ronaldu nafaqat sportda, balki biznes sohasida ham faoliyatini kengaytirmoqda. Bu haqda Zamin.uz xabar berdi.
Hozirda Saudiya Arabistonining "An-Nasr" jamoasida yuqori maosh bilan faoliyat yuritayotgan 41 yoshli portugaliyalik futbolchi yangi biznes loyiha boshladi. Ronaldu 7,5 million dollar miqdorida investitsiya kiritib, zamonaviy raqamli va shaxsiylashtirilgan sog‘liq hamda farovonlik tizimi – Pro2col Software faoliyatida qatnashmoqda.
Rasman ma’lum qilinishicha, u Herbalife kompaniyasiga tegishli HBL Pro2col Software sho‘ba korxonasining 10 foizlik ulushini sotib olgan. Pro2col tizimi Herbalife distribyutorlariga mijozlar bilan samarali ishlash, ularni qo‘llab-quvvatlash uchun zarur vositalar va tahliliy ma’lumotlar taqdim etadi.
Bu tizim orqali shaxsiylashtirilgan ovqatlanish va sog‘lom turmush xizmatlarini yanada kengroq auditoriyaga yetkazish maqsad qilingan. Ronaldu Herbalife kompaniyasi bilan 2013 yildan beri hamkorlik qilib kelmoqda.
Ushbu yangi investitsiya uning sog‘liq va farovonlik sohasidagi faoliyatini yanada kuchaytirishi kutilmoqda.
