Ozoda Nursaidova film uchun ilk bor rol ijro etdi

Xonanda Ozoda Nursaidovaning 2002 yilda kuylangan "Bemor qiz nolasi" va 2006 yilda ijro etilgan "Kechagimas 2" qo‘shiqlari asosida film uchun ssenariy yozilgan. Bu haqda Zamin.uz xabar berdi.

Dastlab ushbu filmning bosh roliga aynan Ozoda Nursaidova taklif etilgan. Biroq xonanda kinoda rol o‘ynamasligini, har bir inson o‘z sohasida ishlagani ma’qul deb hisoblashini bildirgan.

U bergan intervyularidan birida, "Nega kinoda rol o‘ynamaysiz?" degan savolga, o‘z kasbini chin dildan bajarish muhimligini ta’kidlagan. Shuningdek, Ozoda Nursaidova bir vaqtlar ko‘plab filmlarda bosh rol uchun takliflar olgani, ammo ularning barchasini rad etganini ma’lum qilgan.

Lekin bu galgi filmning ssenariysi juda ta’sirli yozilgani bois, u istisno tariqasida kichik bir epizodda qatnashishga rozi bo‘lgan. Xonanda bu qarorini shunday izohlagan: "Rejissyor menga filmning aynan qo‘shiq asosida yaratilganini tushuntirdi.

U voqealar rivoji va syujet mazmuni qo‘shiqdan ilhomlanganini aytib, hech bo‘lmaganda kichik bir rolda ishtirok etishimni so‘radi. Men bunga rozi bo‘ldim.

Filmni tomosha qilar ekanman, juda ta’sirlandim, hatto yig‘lab yubordim." Shunday qilib, Ozoda Nursaidova o‘z prinsiplariga sodiq qolgan holda, faqat mazkur film uchun kichik bir epizodda rol ijro etgan. Bu esa uning ijodiga bo‘lgan mas’uliyati va ssenariyning ta’sirchanligini yana bir bor ko‘rsatadi.