Yulduz Usmonova haqiqiy san’at va ijod haqida gapirdi
O‘zbekiston xalq artisti Yulduz Usmonova yaqinda ijtimoiy tarmoqlarda videomurojaat e’lon qildi. Bu haqda Zamin.uz xabar berdi.
Unda u san’at va ijod olamidagi ayrim holatlarga o‘z munosabatini bildirdi. Xonandaning ta’kidlashicha, uning atrofida bo‘lgan ba’zi shaxslar qisqa vaqt ichida mashhur bo‘lib, “yulduz” maqomini olishga erishgan.
Yulduz Usmonova haqiqiy san’atkor qanday bo‘lishi kerakligi haqida so‘z yuritib, kamtarlik va oddiylik san’atning asosiy tamoyillaridan biri ekanini qayd etdi. U o‘z faoliyatini doimo mehnat va bilimga asoslangan holda olib borayotganini ta’kidladi.
“Ollohga shukr, men haligacha o‘z mehnatim va bilimim bilan harakat qilaman”, dedi xonanda. Shuningdek, Usmonova ayrim ijodkorlarning o‘zlarini shoir yoki san’at namoyondasi sifatida ko‘rsatishga intilayotganini tanqid qildi.
U 40 yillik ijodi davomida ko‘plab qo‘shiqlarining matni va kuyini o‘zi yozganini aytib o‘tdi. Xonanda o‘z ijodida taniqli shoirlar — Mahmud Toir, Muhammad Yusuf va Ohunjon Hakimov asarlaridan ilhomlanganini ham ma’lum qildi.
Shu bilan birga, u kitob o‘qishga katta ahamiyat berishini alohida ta’kidladi. Videomurojaatda Usmonova zamonaviy texnologiyalar, jumladan, sun’iy intellekt vositalaridan foydalanayotgan ijodkorlar haqida ham gapirdi.
Uning fikricha, haqiqiy ijod qalb va bilimdan kelib chiqishi lozim.
