Jim Kerri faxriy "Sezar" mukofoti bilan taqdirlandi

Amerikalik taniqli aktyor Jim Kerri Fransiyaning milliy kino mukofoti — faxriy "Sezar" bilan taqdirlandi. Bu haqda Zamin.uz xabar berdi.

Mukofotni unga "Spotless Mind" filmida birga ishlagan rejissyor Mishel Gondri topshirdi. Jim Kerrining aytishicha, uning ajdodlari Fransiyadan Kanadaga ko‘chib o‘tgan.

U minnatdorlik nutqini fransuzcha talaffuzda aytib, bobosining katta bobosi Mark-Fransua Kerrining Fransiyaning Sen-Malo portidan Kanadaga ko‘chib o‘tganini eslatib o‘tdi. Keyinchalik esa ularning oilasi Los-Anjelesga yo‘l olgan.

Nutqi davomida Jim Kerri otasi Persi Jozef Kerriga alohida minnatdorlik bildirdi. "Otam menga muhabbat, saxovat va kulgini qadrlashni o‘rgatdi.

Agar omad sizga kulib boqishini istasangiz, avval o‘zingiz unga kuling. Bu oson emas, lekin bunga harakat qilish kerak.

Bu lahzani umrbod eslab qolaman. Hayotimni jannat deb bilaman", dedi aktyor.

Ma’lumotlarga ko‘ra, faxriy "Sezar" mukofoti avval ham dunyoning ko‘zga ko‘ringan kino san’ati vakillariga, jumladan, Juliya Roberts, Kristofer Nolan, Devid Fincher, Keyt Blanshett, Robert Redford, Penelopa Krus va Jorj Kluniga topshirilgan. Jim Kerri ham bu ro‘yxatga qo‘shildi.