Yulduz Usmonova ijodkorlarning kamtarlikni unutayotganini tanqid qildi
O‘zbekiston xalq artisti Yulduz Usmonova ijtimoiy tarmoqlarda e’lon qilgan videomurojaatida san’at va ijod olamidagi ba’zi holatlarga o‘z munosabatini bildirdi. Bu haqda Zamin.uz xabar berdi.
Xonanda o‘z atrofida yurgan ayrim shaxslarning qisqa vaqt ichida mashhur bo‘lib ketayotganini ta’kidladi. Uning fikricha, haqiqiy san’atkor har doim kamtar bo‘lishi va yerda mustahkam turishi kerak.
“Shukrki, men hanuzgacha o‘z mehnatim va bilimim bilan faoliyat yuritib kelmoqdaman”, dedi u. Yulduz Usmonova ayrim ijodkorlarning o‘zlarini tezda shoir yoki san’at namoyondasi sifatida ko‘rsatayotganini tanqid qildi.
U o‘zining 40 yillik ijodi davomida ko‘plab qo‘shiqlarining matni va kuyini o‘zi yaratganini aytib o‘tdi. Xonanda Mahmud Toir, Muhammad Yusuf va Ohunjon Hakimov kabi mashhur shoirlarning ijodidan foydalanib kelganini ham ta’kidladi.
Shuningdek, u kitob o‘qishga alohida e’tibor berishini aytdi. Videomurojaatda Usmonova ba’zi zamonaviy ijodkorlarning sun’iy intellekt vositalaridan foydalanayotganini ham tilga oldi va haqiqiy ijodning qalb va bilimdan yaratilishini ta’kidladi.
