Yildiz Tilbe Ramazon oyida muhtojlarga iftor ulashmoqda
Turkiyalik mashhur xonanda Yildiz Tilbe G‘azo va boshqa inqiroz avj olgan hududlarda katta yordam marafonini tashkil etdi. Bu haqda Zamin.uz xabar berdi.
U Ramazon oyi davomida har kuni G‘azoda qurolli to‘qnashuvlar oqibatida ochlikdan aziyat chekayotgan 12 ming kishiga iftor dasturxonini yozib bermoqda. Ma’lum qilinishicha, Tilbe iftor uchun issiq taomlarni nodavlat tashkilotlar orqali yetkazadi va iftor tadbirlarini moliyalashtirish jarayonlarini allaqachon yakunlagan.
Xonanda bu xayrli ishni faqat bir mintaqa bilan cheklamay, "Har bir uyda issiq ovqat bo‘lishi kerak!" shiori ostida keng hududda muhtojlarga yordam qo‘lini cho‘zmoqda. Yordam ishlari Yaman, Suriya, Afg‘oniston, Sharqiy Turkiston, Efiopiya, Janubiy Sudan, Arakan va Kashmir kabi hududlarga ham yetkazilishi rejalashtirilgan.
Ramazon iftori dasturxonining tashkiliy qismi Tilbe nomidan Quddus ko‘ngillilari uyushmasi tomonidan boshqarilmoqda. Bu xayriya tadbirlari orqali ko‘plab muhtoj insonlarga yordam berish va ularni qo‘llab-quvvatlash maqsad qilingan.
