Jenisbek Piyazovdan yangi romantik qo'shiq va videoklip taqdimoti

O‘zbekiston va Qoraqalpog‘iston xalq artisti, opera xonandasi Jenisbek Piyazov o‘zining yangi "Yonimda bo‘lgin" nomli qo‘shig‘ini va unga ishlangan videoklipni muxlislariga namoyish etdi. Bu haqda Zamin.uz xabar berdi.

Ushbu asar sokin va romantik kayfiyatda ijro etilgan bo‘lib, oila, sadoqat va muhabbat kabi muhim qadriyatlarni madh etadi. Qo‘shiq orkestr hamrohligida ijro etiladi.

Kompozitsiyada bastakor Shuxrat Zokirovning pianino ijrosi ham bor. Ushbu asarda opera unsurlari va zamonaviy estrada uslubi uyg‘unlashib, xonandaning akademik ovoz imkoniyatlarini yanada yorqinroq ko‘rsatadi.

Videoklip retro uslubda boshlanadi. Unda bir oilaning shakllanishi, hayot sinovlaridan o‘tib, baxtli lahzalar sari intilishi aks ettirilgan.

Klipda yosh aktyorlar Aysenem Yusupova va Muhammad Ali Aliyev o‘z rollarini ijro etishgan. Ushbu asar orqali tomoshabinlar insoniy qadriyatlar va his-tuyg‘ularni chuqurroq his qilishlari mumkin.

Qo‘shiq va klip birgalikda tinglovchilar va tomoshabinlarga yuksak estetik zavq bag‘ishlaydi.