Riannaning Los Anjelesdagi hashamatli uyi oqqa tutildi

AQSHning Los Anjeles shahrida mashhur xonanda Riannaning hashamatli uyi o‘qqa tutildi. Bu haqda Zamin.uz xabar berdi.

Hodisa yuz bergan paytda xonanda uyda bo‘lganligi ma’lum qilindi. Politsiya ma’lumotlariga ko‘ra, noma’lum ayol AR-15 rusumli miltiqdan foydalanib, Riannaning uyiga bir necha marotaba o‘q uzgan.

Voqea joyiga yetib kelgan huquqni muhofaza qiluvchi organ xodimlari gumonlanuvchi ayolni qo‘lga olishdi. Dastlabki tekshiruvlar natijasida o‘qlar qasr hududining turli joylariga tegib, ammo hech kim jarohat olmaganligi aniqlangan.

Hozircha hujumning sabab va maqsadi noma’lum. Ish Los Anjeles politsiyasining qotillik va talonchilik bo‘yicha maxsus bo‘linmasi tomonidan tergov qilinmoqda.

Rianna ushbu uyda turmush o‘rtog‘i, taniqli xip-hop ijrochisi A$AP Rocky bilan birga yashaydi. Hujum vaqtida xonandaning oila a’zolari uyda bo‘lgan yoki yo‘qligi haqida aniq ma’lumot berilmadi.

Rianna nafaqat “Umbrella” va “Diamonds” kabi musiqiy hitlari bilan, balki “Fenty Beauty” brendi orqali moda va go‘zallik sanoatida ham katta muvaffaqiyatlarga erishgan mashhur shaxs hisoblanadi. Politsiya hodisa yuzasidan tergov ishlarini davom ettirmoqda va qo‘shimcha ma’lumotlar yaqin kunlarda e’lon qilinadi.

Hodisa jamoatchilik orasida katta qiziqish uyg‘otmoqda.