Xorazmlik taniqli xonanda Gulinur o‘ttiz ikki yoshni qarshi oldi
Xorazmlik taniqli xonanda Gulinur 7 aprel kuni o‘zining 32 yoshini qarshi oldi. Bu haqda Zamin.uz xabar berdi.
Vodiy va Xorazm viloyatlari to‘ylarida eng ko‘p taklif etiladigan san’atkorlardan biri bo‘lgan ijodkor o‘zining sho‘x qo‘shiqlari bilan elga tanilgan. Sahna ortida esa u tabiatan og‘ir-bosiq, hayotga o‘ziga xos qarashlari bilan ajralib turadigan inson sifatida gavdalanadi.
Uning repertuaridan o‘rin olgan Jaylan, Kerak emas, Duydim axir, Yuragimni yaraladi hamda Jo‘ji kara kabi taronalar muxlislar qalbidan chuqur joy olgan. Gulinur 1994 yilning 7 aprelida Xorazm viloyatining Shovot tumanida dunyoga kelgan.
Oila farzandlarining ikkinchisi bo‘lgan xonanda san’at olamiga 2013 yilda kirib kelgan. Ijodiy faoliyatining ilk davrlarida to‘ylarda popuri janridagi qo‘shiqlarni ijro etib, internet tarmog‘i orqali o‘z muxlislarini orttirganini eslaydi.
O‘sha kezlari ijtimoiy tarmoqlar hozirgidek rivojlanmagan bo‘lsa-da, videolar va telefon raqamlari orqali o‘zini keng jamoatchilikka tanitishga muvaffaq bo‘lgan. Xonanda o‘z muvaffaqiyatlarida otasining o‘rnini alohida ta’kidlaydi.
U otasini hayotdagi eng katta tayanchi deb biladi. Otasi unga doimo dalda berib, boshlagan yo‘lidan qaytmaslikni, oxirigacha borishni uqtirgan.
O‘g‘il farzand o‘rnini ham bosadigan qizidan doimo faxrlanib, uni ruhlantirib kelgan. Gulinur bugungi erishgan barcha yutuqlarini avvalo ota-ona duosi bilan bog‘laydi.
San’at olamiga bo‘lgan qarashlarida u ijod va shou-biznes tushunchalarini bir-biridan ajratib ko‘rsatadi. Yulduz Usmonova, Ozoda Nursaidova hamda Ozodbek Nazarbekov ijodini haqiqiy san’at deb baholagan holda, hozirgi yosh ijodkorlarning aksariyatini shou-biznes vakillari deb hisoblaydi.
Gulinur san’atga pul yoki shon-shuhrat ilinjida emas, bolalikdan bo‘lgan orzu va havas bilan kirib kelganini aytadi. U katta sahnalarda chiqish qilish, muxlislar olqishiga sazovor bo‘lish va yakkaxon konsertlar berishni bolaligidan niyat qilgan.
2016 yildan boshlab o‘zining mualliflik qo‘shiqlarini taqdim etgan bo‘lsa, 2018 yilda ilk yirik konsert dasturlarini muxlislariga havola etgan. Tabiatan juda ta’sirchan inson ekanini yashirmaydi.
Ba’zan oddiy va samimiy gaplardan ham ko‘ngli yumshab, ko‘ziga yosh olishi mumkin. Atrofidagilarning holatiga bee’tibor bo‘la olmasligi uning insoniy fazilatlaridan biridir.
Ijodiy rejalari haqida gapirar ekan, hozircha asosan sho‘x taronalar kuylayotgan bo‘lsa-da, kelajakda chuqur ma’noli va falsafiy asarlar yaratish niyati borligini bildiradi. Sahnada o‘ziga xos qat’iyat va qattiqqo‘llik bilan tanilgan.
To‘y xizmatlarida yuzaga keladigan tushunmovchiliklar yoki tartibsizliklarga nisbatan murosasiz munosabatda bo‘lishi, ba’zan esa intizomni saqlash uchun qat’iy choralar ko‘rishi ham sir emas. Uning fikricha, sahnada har doim intizom va hurmat chegarasi bo‘lishi shart.
Shaxsiy hayotiga to‘xtaladigan bo‘lsak, xonanda 2020 yilda turmush qurgan. U uy ishlari bilan sahna faoliyatini birdek muvozanatda olib borishga harakat qiladi.
Turmush o‘rtog‘ining talabi va rashki tufayli ijtimoiy tarmoqlardagi faoliyatida ham ma’lum cheklovlar o‘rnatgani ma’lum. Shuningdek, texnika va qimmatbaho avtomobillarga qiziqishi yuqori bo‘lgan xonanda o‘ziga Tahoe va Lexus rusumli mashinalar xarid qilgan, otasiga ham munosib sovg‘a ulashgan.
